ஐந்தே வரியில் நிலையாமைபுறநானூறு பாடலில் எப்படி ???

 ஐந்தே வரியில் நிலையாமைபுறநானூறு பாடலில்  எப்படி ???

"அற்றைத் திங்கள் அவ்வெண்நிலவில்

எந்தையும் உடையேம்; எம் குன்றும் பிறர் கொளார்,

இற்றைத் திங்கள் இவ்வெண்நிலவில்

வென்று எறி முரசின் வேந்தர் எம்

குன்றும் கொண்டார்; யாம் எந்தையும் இலமே!

இந்த பாடலின் பொருள் தெரிந்துக்கொள்ள கீழே உள்ள கதையை முழுமையாக வாசித்துவிட்டு வாருங்கள்..

பறம்பு மலையை  மூவேந்தர்கள்  வியக்கும் வண்ணம் ஆட்சி செய்துவந்தார் பாரி. கடையேழு வள்ளல்களில் ஒருவனாகப் பாடப்பட்டவர் பாரி இதனால்  மூவேந்தர்களுக்கு பாரியின் மீது ஒரு பொறமை. . எல்லாப் புலவர்களும்  பாரியை  பற்றியே பாடிக் கொண்டு இருந்தனர். இது போதாதா பகைமைத் தீயை வளர்க்க ?  சேர, சோழ,பாண்டியர்கள்  நாடு முழுக்க ஆண்டவர்கள். ஆனால் பாரி 3௦௦ கிராமங்களை மட்டும்  கொண்ட  பறம்பு நாட்டு மன்னன் பாரிக்கு  இவ்வளவு புகழா? என்று எண்ணி பாரியை போரில் வீழ்த்தமுடியாத என்பதால்   பல்வேறு சூழ்ச்சிகள் செய்து பாரியை  அழிக்க திட்டமிட்டுக் கொண்டிருந்தனர். பாரிக்கு இரண்டு மகள்கள். அங்கவை, சங்கவை. அழகும், அறிவும் நிரம்பப் பெற்றவர்கள். பாரியைப் போன்றே ஈகை குணம் கொண்டவர்கள்.

 மூவேந்தர்களும் தனித்தனியாக  பாரியிடம் சென்று பெண் கேட்டனர். அவர்கள் மூவர்க்கும் , பட்டத்து ராணிகளும் இருந்தனர் .  இருந்தாலும் பறம்பு மலையை தன் வசமாக்கிக் கொள்ள அந்த இரண்டு பெண்களைக் கேட்டனர். பாரி மறுத்தான். இதற்காகவே காத்து இருந்த மூவேந்தர்கள் பறம்பு நாட்டின் மீது போர் தொடுத்தனர். 

பறம்பு நாட்டின் கோட்டைகளை சுற்றி முற்றுகை இட்டனர். நாட்கள்தான் போனதே தவிர கோட்டையை பிடிக்க முடியவில்லை. ஆனால் பறம்பு நாட்டு மக்கள் அவதிப்பட ஆரம்பித்தினர்.

சங்கப் புலவர் கபிலர் பாரியின் உற்ற நண்பர். அவர் பாரியின் சார்பாக மூவேந்தர்களை சந்தித்து போரை நிறுத்தும்மாறு கேட்டு கொண்டார். பாரியின் பெருமையை எடுத்துக் கூறினார். அப்பிடிக் கூறும் போது பாரி புலவர்கள் கேட்டால் நாட்டையே கொடுத்து விடுவான் என்று ஒரு வார்த்தை சொல்லுகிறார். மூவேந்தர்களும், புலவர்கள் போல வேடம் இட்டுக் கொண்டு பாரியின் கோட்டைக்குள் சென்று பாரியைச் சூழ்ந்து கொன்று விடுகின்றனர்.

பறம்பு நாட்டினை  பிடித்துக்கொண்ட மூவேந்தர்களும்  பாரி மகளிரை அரசவையில் வைத்து அவமானப்படுத்தி வெளியே துரத்தி விட்டனர். கபிலர் மனமுடைந்து போகிறார்.  பாரி மகளிரை மனதில் கொண்டு அவர்களுடன் நாட்டை விட்டு வெளியேறினார். 

 ஆனாலும்  மூவேந்தர்களுக்கு பயந்து எந்த குறு நில மன்னர்களும் பாரி மகளிரை மணம் புரிய முன் வரவில்லை  திருக்கோயிலூர் மலையமான், காரி  முன் வந்து அங்கவையை மணம் புரிந்தார்.இருப்பினும் கடுங்கோபமுற்ற   மூவேந்தர்கள் மூவரும்  காரியை கொன்று விடுகின்றனர். இதனால் மனமுடைந்த  அங்கவை தீக்குளித்து இறந்து போகிறாள். 

கபிலர் சங்கவையைச் தனது சொந்தக்காரர்களிடம் ஒப்படைத்துவிட்டு  அதே திருக்கோயிலூரில் வடக்கிருந்து தற்கொலை செய்து கொண்டார், கபிலர். 

மீண்டும் பாடலை மீள் வாசிப்பு செய்து பாருங்கள் ஐந்தே வரிகள்தான். அன்று  வந்ததும் இதே நிலாதான், ஆனால் அப்போது எங்கள் தந்தை எங்களுடன் இருந்தார், எங்கள் குன்றிலும் பிறர் ஆக்கிரமிக்கவில்லை. அனால் இன்று  வந்திருப்பதும் அதே நிலாதான். இப்போது, வெற்றி ஒலி செய்யும் முரசைக் கொண்ட மூவேந்தர்கள் எங்கள் குன்றைக் கைப்பற்றிக்கொண்டார்கள். நாங்கள் எங்கள் தந்தையையும் இழந்துவிட்டோம்.   இரவிலிருந்து மீண்டும் மறு இரவு வருவதற்குள் தங்கள் வாழ்க்கை தலைகீழாகப் புரட்டிப்போடப்பட்டுவிட்டது என்று வாழ்வின் நிலையாமையை எவ்வளவு அழகாக விளக்கியுள்ளனர் பாரி மகளிர்.